सुनको मूल्यले बनायो नयाँ रेकर्ड
काठमाण्डौं-नेपाली बजारमा सुनको मूल्यले रेकर्ड कायम गरेको छ। सुन हालसम्मैकै सबैभन्दा महंगो मूल्यमा आज कारोबार भइरहेको छ। नेपाल सुनचाँदी व्यवसायी महासंघका अनुसार आज सुनको मूल्य प्रतितोला १ लाख ५ हजार ५०० रुपैयाँ कायम भएको छ। मंगलबार १ लाख ३ हजार कायम भएको थियो।नेपाली बजारमा आज सुनको मूल्य प्रतितोला २ हजार ५०० रुपैयाँले बढेको हो। महासंघका अनुसार आज छापावाल सुनको भाउ तोलाको १ लाख ५ हजार ५०० रुपैयाँ र तेजाबी सुनको मूल्य तोलाको १ लाख ५ हजार रुपैयाँ निर्धारण भएको छ।
आज चाँदीको मूल्य पनि तोलामा ४० रुपैयाँले बढेको छ। मंगलबार १ हजार ४१० रुपैयाँमा कारोबार भएको चाँदी बुधबार १ हजार ४५० रुपैयाँ कायम भएको छ।यसअघि २०७७ साउन २३ गते सुनको मूल्य प्रतितोला १ लाख ३ हजार ५०० रुपैयाँमा कारोबार भएको थियो। त्यतिबेला कोरोना महामारीका कारण सुनको माग अत्याधिक बढ्दा मूल्य आकासिएको थियो। यस पटक भने युक्रेनमाथि रुसको आक्रमणका कारण सुनको भाउ बढेको बताइएको छ।