मकवानपुर खेलकुद अध्यक्षमा खड्गी
हेटौंडा- जिल्ला खेलकुद विकास समिति मकवानपुरको अध्यक्षमा भेष खड्गी नियुक्त भएका छन् । बागमतीको प्रदेश खेलकुद विकास परिषद्ले मकवानपुरसहित प्रदेशका ११ वटा जिल्ला
खेलकुद समितिको अध्यक्ष नियुक्त गरेको छ ।प्रदेश खेलकुद विकास परिषद्ले सत्ता गठबन्धनमा रहेका दलहरुलाई भागबण्डाको आधारमा जिल्लास्थित खेलकुल समिति अध्यक्ष नियुक्त गरेको हो । तत्कालीन जिल्ला खेलकुद विकास समिति मकवानपुरको कोषाध्यक्षसमेत भइसकेका खड्गी अध्यक्षमा नियुक्त भएका हुन् । नवनियुक्त अध्यक्ष खड्गीलाई हेटौंडा–५ क्याम्पा रंगशालामा जारी फुटबलकै क्रममा स्वागत तथा सम्मान गरिएको थियो । जिल्लासमिति पाँच सदस्यीय रहने व्यवस्था छ । हाल जिल्ला अध्यक्ष मात्रै नियुक्त भएपनि परिषद्ले पछि भागबण्डा मिलाएर सदस्य नियुक्त गर्ने जनाइएको
छ ।
परिषद्का अनुसार काठमाडौं र भक्तपुर समितिमा भने अध्यक्ष नियुक्त भएका छैनन् । भागबण्डामा माओवादी केन्द्रका ६, कांग्रेस ३ र नेकपा एसबाट दुईजना नियुक्त भएका छन् । मकवानपुरमा खड्गीसहित रामेछापमा सरोज मगर, सिन्धुलीमा वीरबहादुर थिङ, धादिङमा प्रतापसिं तामाङ, चितवनमा उत्तम गुरुङ, रसुवामा दावा तामाङ, नुवाकोटमा बुद्धिमान तामाङ, ललितपुरमा विनोद महर्जन, काभ्रेमा मानबहादुर लामा, सिन्धुपाल्चोकमा सुदेश राना, दोलखामा रामहरि शिवाकोटी चयन भएका छन् । नवनियुक्त अध्यक्षहरुको कार्यकाल दुई वर्षको हुनेछ ।
