माओवादी बागमती संसदीय दलको नेतामा जुटेन सहमति
हेटौंडा काठमाडौंमा नेकपा माओवादी केन्द्र बागमती प्रदेश संसदीय दलको नेता चयन गर्न बसेको बैठकमा सहमति जुट्न सकेन ।शुक्रबार भएको बैठकमा दलको नेताका लागि आकांक्षीहरु ५ जनासम्म देखिएपछि सहमति जुट्न नसकेको जनाइएको छ । सर्वसम्मतिमै दलको नेता चयन गर्ने पहिलो प्रयास सफल हुन नसकेको हो । बैठक आज १ बजेका लागि पुनः बोलाइएको छ । बागमतीमा नेपाली कांग्रेसले निर्वाचनबाट, नेकपा एमाले र राप्रपालगायत दलले सर्वसम्मतिबाट दलको नेता चयन गरिसकेका छन् । तर, माओवादीमा दलको नेताका लागि आकांक्षीहरु धेरै देखिएपछि सहमतिको लागि प्रयास जारी राखिएको छ ।
सहमित जुट्न नसकेको प्रदेश सांसद् युवराज चौलागाईले जानकारी दिए । सकभर सहमतिमै दलको नेता टुंग्याउने भावना धेरैको भएकाले सहमति खोज्ने प्रयास सुरु भएको उनले बताए । मकवानपुरबाट निर्वाचित सांसद् प्रेमबहादुर पुलामीले बैठकमा सहभागी नेताहरुले पहिलो दिन धारणामात्रै प्रस्तुत गरेको जानकारी दिए । उनले पहिलो दिन नेताहरुको धारणा प्रस्तुत भएको र आज शनिबार हुने बैठकले दलको नेता चयन गर्ने बताए । शुक्रबारको बैठकमा प्रदेश सरकारमा जाँदा पार्टीको भूमिका, सरकारमा लिने भागबण्डाको विषयमा धेरै छलफल भएको बताए ।
माओवादीभित्र दलको नेताको लागि आधा दर्जन बढी नेताले इच्छा देखाएपछि सहमतिको सम्भावना न्यून बन्दै गएको जनाइएको छ । सहमति नै हुन नसकेमा निर्वाचनबाट भएपनि दलको नेता चयन गरिने जनाइएको छ । काठमाडौंमा जारी बैठकमा दलको नेताको लागि पोलिटब्यूरो सदस्य शालिकराम जम्मकट्टेल, माओवादी केन्द्र वागमती प्रदेशका अध्यक्ष सरल सहयात्री पौडेल, युवराज दुलाल
‘शरद’, प्रदेशसभाको पूर्वउपसभामुख राधिका तामाङ र माओवादी केन्द्रको चुनाव चिन्हबाट निर्वाचनमा प्रतिस्पर्धा गरेर जितेका नेपाल समाजवादी पार्टीका नेता गंगानारायण श्रेष्ठसहित आधा दर्जन नेताहरुले इच्छा देखाएको बताइएको छ ।
प्रदेशसभाको पहिलो कार्यकालमा दलको नेता जम्मकट्टेल र उपनेता कुमारी मोक्तान थिइन् । दलको नेतामा प्रतिस्पर्धा गरिरहेका मध्ये जम्मकट्टेल तत्कालीन नेकपा सरकार हुँदा आन्तरिक मामिला तथा कानुन मन्त्री र पछि नेकपा (एकीकृत समाजवादी) को नेतृत्व सरकार रहँदा आर्थिक मामिला तथा योजना मन्त्री बनेका थिए । दुलाल र मोक्तान सामाजिक विकास मन्त्री भइसकेका छन् । पौडेललगायतका अन्य सांसद्हरु पहिलोपटक प्रदेशसभा प्रवेश गरेका छन् ।
बागमतीमा माओवादीबाट कूल २१ सांसद् छन् । बागमती प्रदेशको हकमा माओवादी पार्टी भाग्यशाली बनेको छ । पहिलो कार्यकालमा पार्टी टुटफुटको स्थितिमा पनि प्रतिपक्षमा बस्नु परेको थिएन । हाल गठबन्धन टुट्दा पनि सरकारमै सहभागी हुने भएको छ । बागमतीमा सरकारको नेतृत्व माओवादीले पाउनेबारे चर्चा भइरहेको छ । तर, बागमतीमा एमाले र राप्रपाले पनि दाबी गरेका छन् ।
राप्रपाको समर्थन नभई बागमतीमा सरकार बन्ने अवस्था भने छैन । १ सय १० सदस्यीय प्रदेशसभामा सरकार बनाउन ५६ सिट चाहिन्छ । हालको गठबन्धनको एमाले, माओवादी र राप्रपासँग मात्रै ६१ सिट छ । एमालेसँग २७ र राप्रपासँग १३ सिट रहेको हो ।