नेपालीमा सर्वोत्कृट नतिजा ल्याउने म्यानेजमेन्टका दुई विद्यार्थी पुरस्कृत
हेटौंडा- मकवानपुर जिल्लाबाट कक्षा १२ को परीक्षामा अनिवार्य नेपाली विषयमा सर्वोत्कृष्ट नतिजा ल्याउने प्रज्ज्वल चौधरी र अन्तरा महतोलाई नेपाली लेखक संघ मकवानपुरले पुरस्कृत गरेको छ ।लेखक संघको शनिबार भएको ८ र ९ औं साधारणसभाको अवसरमा हेटौंडा स्कुल अफ म्यानेजमेन्टबाट कक्षा १२ उत्तीर्ण गरेका चौधरी र महतोलाई दामोदर लोकप्रिया स्मृति पुरस्कार प्रदान गरिएको हो । सर्वोत्कृष्ट नतिजा ल्याउने छात्र र छात्रालाई नगद ११÷११ हजार रुपैयाँसहित प्रमाणपत्र प्रदान गरिएको हो ।
नेपाली लेखक संघ मकवानपुरका निवर्तमान अध्यक्ष विष्णुप्रसाद गौतम र उनका मामा माधवप्रसाद पोखरेलले आफ्ना पूर्वजको स्मृतिमा पुरस्कार स्थापना गरेका हुन् । यस वर्षदेखि सुरु गरिएको पुरस्कार आगामी वर्षहरुमा पनि निरन्तर प्रदान गरिने नेपाली लेखक संघ मकवानपुरका अध्यक्ष छवि अनित्यले जानकारी दिए ।नेपाली लेखक संघ मकवानपुरका अध्यक्ष अनित्यको अध्यक्षतामा भएको साधारणसभामा नेपाली लेखक संघका केन्द्रीय सदस्य ह्यग्रीव आचार्यको प्रमुख आतिथ्यता रहेको थियो ।
कार्यक्रममा नेपाली कांग्रेस मकवानपुरका निवर्तमान कार्यवहाक सभापति विष्णुप्रसाद लामिछाने, लेखक संघ मकवानपुरका संस्थापक अध्यक्ष कृष्णप्रसाद दाहाल, पुरस्कार संस्थापक विष्णप्रसाद गौतमलगायतले आफ्नो धारणा व्यक्त गरेका थिए ।
