मकवानपुरगढीमा वर्षाका कारण धान बालीमा क्षति
हेटौंडा-बेमौसमी वर्षाका कारण धानबालीमा क्षति भएको छ । कृषकहरुले लगाएको धानबालीमा मंगलबार विहान र राती आएको हावासहितको पानीले क्षति पु¥याएको हो ।मकवानपुरको मकवानपुरगढी गाउँपालिका–५ सिमलटार, धादिङफाँट सहित गाउँपालिकाको विभिन्न स्थानमा धानबालीमा क्षती पुगेको स्थानीय किसानहरुले बताएका छन् । सिमलटारका कृषक एटबहादुर बस्नेतका अनुसार धानबाली भित्राउने समयमा हावासहितको पानीले खेतमै धान ढलेकाले चिन्तित बनाएको बताए ।
मंगलबार विहान राती करिब २ बजे हावा सहितको वर्षाले धान पाकेर भित्राउन जुटेका किसान बाली नोक्सान हुने पीरले चिन्तित बनाएको बताए । अझै वर्षा भएमा पाकेको धानबाली खेतमै कुहिने चिन्ता बढेको उनले बताए । अर्का किसान विष्णुकुमारी बजगाईले पाकेको धान काटेर खेतमा सुकाउँदा पानीले गर्दा धान र पराल दुवैमा असर परेको बताइन् । वर्षभर खाने उपजमा यसरी बैमौसमी वर्षाले गर्दा यस क्षेत्रका सयौं किसानहरु मर्कामा परेको बजगाई बताउँछिन् ।
गाउँपालिका कृषि शाखाप्रमुख चन्द्रकान्त चौधरीका अनुसार मंगलबार विहान आएको हावा सहितको पानीले पालिकाभित्रका विभिन्न स्थानमा धानबालीमा क्षति पुगेको छ । मकवानपुरगढी मात्र नभई मनहरी गाउँपालिकाका रजैया, ज्यामिरे, सिमपानी, हाँडीखोला क्षेत्रमा पनि धानबालीमा क्षति पुगेको मनहरी गाउँपालिकाले जनाएको छ । मकवानपुरको अधिकांश क्षेत्रमा पाक्न लागेको धानमा पानीले क्षति गरेपछि किसानहरु चिन्तित रहेका छन् ।
गतवर्ष पनि पाक्न लागेको धानबालीमा मनसुन बाहिरिने बेला परेको वर्षासँगैको असिना र हावाहुरीका कारण ठूलो क्षति पुगेको थियो । यो वर्ष मकवानपुरमा मात्र नभइ देशका बिभिन्न जिल्लामा बालीनालीमा क्षति पुगेको छ । पर्वतमा धानबालीमा क्षति पुगेको छ । सोमबार र मंगलबारको वर्षा तथा हावाहुरीले पर्वतका विभिन्न स्थानमा लगाइएको धानबालीमा क्षति पुगेको हो । केही स्थानमा धान ढलेर सोत्तर बनेको कृषकले गुनासो गरेका छन् ।
पर्वतको कुश्मा, फलेवास, विहादी, जलजला, पैयुँ र मोदीका विभिन्न वडामा लगाइएको धानबालीमा हावाहुरी र असिनाले क्षति पु¥याएको छ । कतिपय ठाउँमा सामान्य असिनासमेत परेर धान झारेको कुश्मा नगरपालिका–८ चुवाका कृषक रुद्रप्रसाद शर्माले जानकारी दिए । पाक्न थालेको धान हावाहुरी र पानीले पूरै सोत्तर बनाएको उनको गुनासो छ ।त्यसैगरी, कुश्मा वडा–१ पाङको फाँट, वडा–९ ज्ञादीको फाँट, कुर्घा र बर्राचौरको फाँटमा समेत धान पूरै ढलेको छ ।
फसल भित्राउने बेलामा धान ढल्दा राम्रोसँग नपाक्ने, गेडा पुष्ट नहुने र उत्पादनमा समेत ह्रास आउने कुश्मा नगरपालिकाका कृषि शाखाप्रमुख बलबहादुर जिटीले जानकारी दिए ।कृषि ज्ञानकेन्द्रका पर्वतका प्रमुख वरिष्ठ कृषिविकास अधिकृत परशुराम अधिकारीले वर्षा, असिना र हावाहुरीले धानबालीमा पु¥याएको क्षतिबारे विवरण संकलन भइरहेको जानकारी दिए । उनले पर्वतको सातवटै पालिकाबाट धानबालीमा पुगेको असरका बारेमा विवरण संकलनको काम भइरहेको बताए ।
कैलालीमा केरा तयार भएर आम्दानी लिने समयमा आएको बेमौसमी वर्षासँगैको हावाहुरीले किसानलाई नोक्सान भएको छ । हावाहुरीले केराखेतीमा लाखौँ रुपैयाँको क्षति पुर्याएको किसानको भनाइ छ । गत असोज २९ गते वर्षासँगै आएको हावाहुरीले कैलालीमा धानबाली र केराखेतीमा क्षति भएको छ । पाँच बिघा क्षेत्रफलमा केराखेती गरेका टीकापुर–५ झन्झटपुरका रेवन्त साउदको केराबारीमा करिब ७५ प्रतिशत क्षति भएको छ । बारीमा भएका अधिकांश केराका बोट हावाहुरीले ढालेको छ । उत्पादन लिने समयमा हावाहुरीले एकैपटक क्षति पु¥याउँदा उनलाई निकै पीडा भएको बताएका छन् ।
वर्षभरिको मेहनत खेर गएको, लगानी पनि डुबेको किसानहरुले बताएका छन् । अर्का केरा उत्पादक किसान रामबहादुर कुँवरले पनि जोशीपुरको झवही, टीकापुरको शंकरपुर र जानकीको गोलौरीमा गरी ३२ बिघा क्षेत्रफलमा केराखेती गरेका छन् । उनकोबारीमा पनि क्षति भएको छ । ‘अहिलेसम्म कति बोट ढले भन्ने यकिन छैन’, उनले भने किसानलाई कसैगरी पनि उभो लाग्ने वातावरण छैन, गएको वर्ष खडेरीले केरा बिग्रियो अहिले फेरि हावाहुरीले ठूलो क्षति गर्यो ।’
