देव र नरेन्द्रको जोडीलाई ब्याडमिन्टन उपाधि
हेटौंडा-मकवानपुरको थाहानगरस्तरीय प्रथम जेसीज कप डबल ब्याडमिन्टन प्रतियोगिताको उपाधि देव अर्याल र नरेन्द्र मोक्तानको जोडीले हात पारेको छ ।थाहा नगरपालिका–४ क्याम्पाडाँडा कबर्डहलमा भएको प्रतियोगितामा १२ टिमलाई पछि पार्दै उनीहरुले उपाधि चुमेका हुन् । प्रतियोगितामा संग्राम केसी र मधुसुदन चौधरीको जोडी दोस्रो भएको छ । कडा प्रतिस्पर्धाकाबीच भएको खेलमा पहिलो एक÷एक सेट जितेका दुवै प्रतिस्पर्धीले अन्तिम सेटमा देव र नरेन्द्रको टिमले आग्रता लिएपछि उपाधि उचालेका हुन् । प्रथम भएसँगै उनीहरुले नगद १० हजार, शिल्ड, मेडल तथा प्रमाणपत्र पाएका छन् ।
उनीहरुलाई कार्यक्रमका प्रमुखअतिथि थाहानगर खेलकुद विकास समितिका संयोजक तथा वडा नम्बर १२ का वडाध्यक्ष टीकाराम स्याङ्तानले पुरस्कार वितरण गरेका थिए । थाहा नगरपालिका–३ का वडाध्यक्ष हिरेन्द्रकुमार रायमाझीे विशेष अतिथि रहेको पुरस्कार वितरण समारोह पालुङ जेसीज वर्ष २०२४ का अध्यक्ष निरज रायमाझीको अध्यक्षतामा भएको थियो ।प्रतियोगितामा दोस्रो भएको संग्राम र मधुसुदनको टिमले नगद ७ हजार शिल्ड, मेडल तथा प्रमाणपत्र पाएको छ ।
१३ टिमाको सहभागिता रहेको जेसीजकप ब्याडमिन्टन प्रतियोगिताको उत्कृष्ट खेलाडी संग्राम केसी घोषित भए । उनले नगद २ हजार पाँचसय पुरस्कारसहित ट्रफी हात पारेका छन् । प्रतियोगिता १३ भादौबाट लिगचरण अन्तर्गत रही खेलाइएको थियो । प्रतियोगिताका मुख्य निर्णायक यादवज· रायमाझी रहेका थिए ।
प्रतियोगिताका लागि प्रथम पुरस्कार पालुङ जेसीजका वर्ष २०२४ का अध्यक्ष निरज रायमाझीले आफ्नो हजुरबुबा स्वर्गीय रणबहादुर रायमाझीको नाममा प्रायोजन गरेका थिए प्रथम शिल्ड र मेडल पालुङ जेसीज वर्ष २०२४ का महासचिव विक्रम गोपालीले प्रायोजन गरेका थिए । द्वितीय पुरस्कार मकवानपुरगढी जेसीज वर्ष २०२४ का अध्यक्ष विजय पुडासैनीले प्रायोजन गरेका थिए भने शिल्ड र मेडल पालुङ जेसीज वर्ष २०२४ का कोषाध्यक्ष संजय गोपालीले प्रायोजन गरेका थिए । त्यसैगरी उत्कृष्ष्ट खेलाडीको नगद पुरस्कार सिमरा जेसीजका वर्ष २०२४ का अध्यक्ष लक्की रिमाल र ट्रफी पालुङ जेसीजका श्रीकृष्ण श्रेष्ठले प्रायोजन गरेका थिए ।
पुरस्कार वितरण कार्यक्रममा वडा नम्बर ४ का वडाध्यक्ष नारायण लामा, इलाका प्रहरी कार्यालयका प्रमुख श्याम थापा, पालुङ जेसीजका पूर्वअध्यक्ष तथा पदाअधिकारी, स्थानीय संघसंस्थाका पदाअधिकारी, सञ्चारकर्मी तथा खेलाडी र खेलप्रेमीको आतिथ्यता रहेको थियो । पालुङ जेसीजको आयोजनामा भएको प्रतियोगिताको समन्वय थाहानगर ब्याडमिन्टन संघ, फरक सोच र शिखर क्लबले गरेको थियो । प्रतियोगिताको मिडिया पार्टनरमा पालिका प्रेस डटकम, थाहापाटी, थाहाटाइम्स, बाइरोड न्यूज, दामन एफएम र टिम टेलिभिजन हेटौंडा रहेका थिए ।
सुशान्त श्रेष्ठको संयोजकत्वमा भएको प्रतियोगिताको प्रचारप्रसारमा सहयोग गर्ने सञ्चारमाध्यमहरु, पुरस्कार प्रायोजक, सहयोगी संस्थालाई कदरपत्रसहित सम्मान गरिएको थियो । अतिथिलाई पालुङ जेसीज अध्यक्ष नीरज रायमाझीले मायाँकोचिनोस्वरुप ‘रुदाने’ पुस्तक प्रदान गरेका थिए । सन् २००० मा स्थापना भएको पालुङ जेसीजले विभिन्न सामाजिक कार्यहरु गर्दै आएको छ ।
