मनहरीमा स्करपियो दुर्घटना हुँदा ४ जना घाइते
हेटौंडा-मकवानपुरको मनहरीमा स्करपियो दुर्घटना हुँदा ४ जना घाइते भएका छन् । मनहरी गाउँपालिका–९ खर·ास्थित पूर्वपश्चिम सडक खण्डमा आफैं अनियन्त्रित भई स्करपियो पल्टिएर दुर्घटना भएको जिल्ला प्रहरी कार्यालय मकवानपुरले जनाएको छ । बाराको निजगढबाट चितवनतर्फ जाँदै गरेको प्रदेश ३–०१–२२ च ६८६२ नम्बरको स्करपियो आफैं अनियन्त्रित भई सडक बायाँ साइडमा रहेको विद्युतको पोललाई ठक्कर दिई सडकबाट ५० मिटर तल खसेर दुर्घटना भएको जिल्ला प्रहरी कार्यालय मकवानपुरका प्रवक्ता प्रहरी नायवउपरीक्षक श्यामु अर्यालले जानकारी दिए । उनका अनुसार दुर्घटनामा ४ जना घाइते भएका छन् ।
दुर्घटनामा स्करपियो चालक निजगढ नगरपालिका–७ बस्ने ४५ वर्षीय धनबहादुर स्याङ्तान, उनकी श्रीमती ३८ वर्षीया हरिमाया लामा, उनको छोरा १३ वर्षीय यरोश तामाङ र सोहीस्थानका ३३ वर्षीय सबु लामा घाइते भएको प्रहरीप्रवक्ता अर्यालले बताए । उनीहरुको मनहरी अस्पतालमा सामान्य उपचारपछि थप उपचारका लागि भरतपुर अस्पतालमा रिफर गरिएको छ । घाइते सबैको अवस्था सामान्य रहेको प्रहरीको भनाई छ ।
