हेटौंडा जेसीजमा पंकजदासको प्यानलका सबैले जिते
हेटौंडा-जेसीआई हेटौंडा वर्ष २०२५ को अध्यक्षमा पंकजदास बानियाँ निर्वाचित भएका छन् । शनिवार साँझ सम्पन्न मतगणनाअनुसार बानियाँको प्यानल नै विजयी भएको छ ।प्यानल बनाएर अध्यक्ष, दुई कार्यकारिणी उपाध्यक्ष र चार उपाध्यक्षका लागि निर्वाचन भएको थियो । अध्यक्षमा ४ मतले बानियाँ विजयी भए । हेटौंडा जेसीजको शाखा अधिवेशन तथा निर्वाचन कार्यक्रमबाट बानियाँले ९२ मत प्राप्त गरे । उनका निकटतम प्रतिद्वन्द्वी विवेकआनन्द न्यौपानेले ८८ मत प्राप्त गर्दै पराजय व्यवहोरेका छन् । निर्वाचन समितिका अनुसार १ सय ९९ मतदाता रहेकोमा १ सय ८० मत खसेको थियो ।
जेसीआई हेटौंडा वर्ष २०२५ को लागि कार्यकारिणी उपाध्यक्षमा सन्तोष पराजुली र विश्वप्रसाद गौतम विजयी भएका छन् । पराजुलीले १ सय २ र गौतमले १ सय १ मत प्राप्त गर्दै कार्यकारिणी उपाध्यक्षमा विजयी भएका हुन् । कार्यकारिणी उपाध्यक्षका अन्य दुई प्रतिस्पर्धी सुदीप तिमल्सिनाले ८५ र गंगाप्रसाद पौडेलले ७० मत प्राप्त गरेका छन् ।
त्यसैगरी उपाध्यक्षहरुमा किरण आले (१६६), विवेक फुँयाल (१४८), प्रवीण श्रेष्ठ (१२८) र कुशल रिजाल (११३) मत प्राप्त गर्दै विजयी भएका छन् । उपाध्यक्षमा पराजित भएका शिशिर पराजुलीले (८२) र विराज गौतमले (७८) मत पाए । हेटौंडा जेसीजको आगामी बैठकले महासचिव, कोषाध्यक्षलगायतका पदमा मनोनितको निर्णय गर्ने व्यवस्था छ ।
