श्रमिक सहकारीको २३ करोड कारोवार
हेटौंडा- हेटौंडा–४ स्थित श्रमिक सुरक्षित बचत तथा ऋण सहकारी संस्थाको १६ औं वार्षिक साधारण सभा शनिबार भएको छ । संस्थाका अध्यक्ष नवराज अर्यालको सभाध्यक्षता तथा राष्ट्रिय सहकारी महासंघका सदस्य बद्रीप्रसाद लम्सालको प्रमुख आतिथ्यतामा सभा भएको हो ।सहकारीले सदस्यलाई १६ करोड चार लाख २३ हजार ७९७ रुपैयाँ कर्जा लगानी गरेको छ । तीन करोड १३ लाख ७५ हजार ६ सय शेयरपुजीँ रहेको सहकारीमा बचत निक्षेप भने १६ करोड ८५ लाख ८१ हजार ६१५ रुपैयाँ रहेको संस्थाका व्यवस्थापक सुशीलचन्द्र शर्माले बताए । संस्थाको जगेडा कोषमा एक करोड ६६ लाख ७१ हजार ८२४ रुपैयाँ रहेको छ । संस्थाले २०८०÷८१ मा २२ करोड ८१ लाख ८९ हजार ३०६ रुपैयाँ बराबरको कारोबार गरेको प्रतिवेदनमा उल्लेख छ ।
सभामा विभिन्न विधामा सदस्यहरु सम्मान तथा पुरस्कृत गरिएको थियो । जेष्ठसदस्यतर्फ हाजिरमान भुलुन र जगतमाया बासुकला, नियमित मासिक बचततर्फ राजकुमार भट्टराई र नीला सुवेदी, अधिकतम बचत गर्नेतर्फ विनोदकुमार पुडासैनी, ऋणमा धेरै व्याज तिर्नेतर्फ कमल श्रेष्ठ, नियमित ऋणको किस्ता तिर्नेतर्फ प्रवीणाकुमारी कार्कीलाई सम्मान गरिएको थियो । त्यस्तै, एसईइ परीक्षामा उत्कृष्ट अंक ल्याउने निजी विद्यालयतर्फ सन्ध्या देउजालाई पुरस्कृत गरिएको थियो । सामूदायिक विद्यालयतर्फ भने निवेदन नपरेको संस्थाले जनाएको छ ।
कार्यक्रममा जिल्ला बचत तथा ऋण सहकारी संघका सहसचिव विजयबहादुर बस्नेत, नेफ्स्कुन उपसमिति सदस्य आशा अधिकारी, संस्थाका सल्लाहकार धर्मराज बस्नेत, मीनबहादुर प्रधान, पवि शर्मा, अर्जुन अर्याल, कानुनी सल्लाहकार केशवप्रसाद गौतम, संस्थाका पूर्वअध्यक्ष विष्णुप्रसाद दाहाल, उद्योग संघका पूर्वअध्यक्ष माधव अधिकारी, लेखा समिति संयोजक हरिकुमार शर्मा लामिछानेलगायतको आतिथ्यता रहेको थियो ।
