बकैया कप फुटबलको खेलतालिका सार्वजनिक
हेटौंडा-छैठौं संस्करणको बकैया कप फुटबल प्रतियोगिताको खेलतालिका सार्वजनिक भएको छ । शनिवार बकैया खेलकुद विकास समिति संयोजक विजय लामाथिङले प्रतियोगिताको खेल तालिका सार्वजनिक गरेका हुन् ।प्रतियोगितामा सिनियरतर्फको उद्घाटन खेलमा वडा नम्बर ३ र ७ बीच प्रतिस्पर्धा हुने भएको छ । उद्घाटन खेल दिउँसो १ बजे सुरु हुनेछ । यस्तै दोस्रोदिन २५ गते वडा नम्बर ४ र १० बीच तथा वडा नम्बर ६ र ८ बीच प्रतिस्पर्धा हुनेछ । यस्तै २७ गते वडा नम्बर ५ र ९ बीच प्रतिस्पर्धा हुनेछ । यस्तै जुनियरतर्फ पुस २६ गते ११ नम्बर र १२ बीच र २७ गते वडा नम्बर १ र २ बीच प्रतिस्पर्धा हुनेछ । बकैया–३ स्थित बकैया रंगशालामा प्रतियोगिता सञ्चालन हुनेछ ।
यस संस्करणको प्रतियोगितामा सिनियर टिम तथा जुनियर टिमको फरक–फरक प्रतिस्पर्धा हुने भएको हो । यस वर्ष जुनियर टिमबाट विजेता हुने टिम आगामी वर्ष सिनियर टिममा बढुवा हुनेछ भने सिनियर टिमको अन्तिम टिम घटुवा हुने संयोजक लामाले बताए । माघ १ गतेसम्म सञ्चालन हुने प्रतियोगिता नकआउट चरणमा खेलाइने जनाइएको छ । प्रतियोगितामा सिनियरतर्फको विजेता टिमले १ लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले ५० हजार रुपैयाँ प्राप्त गर्नेछन् ।
जुनियरतर्फको विजेताले ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेताले २५ हजार रुपैैयाँ प्राप्त गर्नेछन् । बकैया गाउँपालिका उपाध्यक्ष भक्तबहादुर खत्रीको प्रमुख आतिथ्यतामा भएको खेल तालिका सार्वजनिक कार्यक्रममा बकैयाका वडाअध्यक्षहरु आषिश तितुङ, विश्वराज स्याङ्तान, भुमलसिं घलान, विजय भोलन, लक्ष्मी जिम्बा, फूलबहादुर भोम्जन, मानबहादुर सिंतान, विष्णु नेगी, टंकध्वज लोप्चन, कमला वाईबा, अध्यक्ष गोपाल न्यासुर, ज्ञानेन्द्र बजगाई र कार्यपालिका सदस्य लोकेन्द्र माझीलगायतको आतिथ्यता थियो ।
