संघको वस्तुगत सदस्यमध्ये मोवाइल एशोसिएसन उत्कृष्ट
हेटौंडा-मकवानपुर उद्योग वाणिज्य संघको बुधबार भएको ५८ औं वार्षिकसभामा संघमा आवद्ध वस्तुगत संघमध्ये मोवाइल एशोसिएसन अफ नेपाल मकवानपुर उत्कृष्ट भएको छ ।संघमा आवद्ध रहेका २७ वटा वस्तुगत सदस्यमध्येबाट कार्यसम्पादन मूल्यांकनको आधारमा उत्कृष्ट कार्य गरेको भनि गरिएको सम्मान पुरस्कार समितिका संयोजक एवम् उपाध्यक्ष उज्ज्वल चौलागाईले बताए । एशोसिएसनमा हेटौंडा बजार, थाहानगर र मनहरी गरी १२० भन्दा बढी सदस्य आवद्ध रहेको एशोसिएसनका अध्यक्ष नवराज चौलागाईले बताए । वस्तुगततर्फ उत्कृष्ट भनि सम्मान गरेकोमा संघप्रति आभार व्यक्त गर्दै आगामी दिनमा पनि एशोसिएसनलाई अझ सशक्त रुपले अघि बढाउने उनले बताए ।संघले विभिन्न विधामा उद्योगी, सञ्चारकर्मी, कर्मचारीलाई सम्मान गरेको छ ।
जसमा उद्योगी मोहनकृष्ण श्रेष्ठ, नरहरिनाथ उप्रेती, साहित्यतर्फ साहित्य संगम मकवानपुर, सामाजिक सेवातर्फ मामाघर नेपाललाई सम्मान गरेको थियो । त्यस्तै, पूर्वअध्यक्षतर्फ हिटलर विशेत, पल्पसा हलका परिकल्पनाकार निवर्तमान अध्यक्ष कृष्ण कटुवाललाई सम्मान गरिएको थियो ।सञ्चारकर्मीतर्फ प्रताप विष्ट, गणेशदर्पण अधिकारीलाई सम्मान गरिएको थियो । एक सञ्चारकर्मी सुरेश श्रेष्ठले भने सम्मान नलिने घोषणा गरेका थिए । यसैगरी कर्मचारीतर्फ संघका लेखाअधिकृत दुर्गा लामिछानेलाई नगद सहित सम्मान गरिएकोथियो । संघका अध्यक्ष कृष्णकुमार गुप्ता अग्रवालको सभाध्यक्षतामा भएको सभामा बागमती प्रदेशका मुख्यमन्त्री बहादुरसिंह लामाको प्रमुख आतिथ्यता रहेको थियो ।
