रोजगारमूलक र प्रविधिमैत्री शिक्षामा जोडदिनुपर्छः मन्त्री खड्का
हेटौंडा- बागमती प्रदेश सरकारका खानेपानी, ऊर्जा तथा सिंचाई मन्त्री श्यामबहादुर खड्काले अबको शिक्षा व्यवहारिक, रोजगारमूलक र प्रविधिमैत्री हुनुपर्ने बताएका छन् । औपचारिक शिक्षा हासिल गरिसकेपछि विद्यार्थीले तत्काल रोजगार नपाउने र विदेशिनुपर्ने बाध्यात्मक अवस्थाप्रति चिन्ता व्यक्त गर्दै मन्त्री खड्काले अब दिइने शिक्षा व्यवहारमा लागू हुने, रोजगारमूलक र प्रविधियुक्त हुनुपर्नेमा जोड दिएका हुन् । हेटौंडा–२ स्थित सिद्धार्थ माविको ४६ औं अभिभावक भेला शुक्रबार उद्घाटन गर्दै मन्त्री खड्काले अब कृषि शिक्षालाई नेपालको भूमि सुहाउँदो पाठ्यक्रम बनाएर लागू गर्नुपर्ने रबालबालिकाको चाहना, रुचि, स्वभाव र व्यवहार अनुकुल पढ्न पाउने व्यवस्था लागू हुनुपर्ने बताए ।
औपचारिक शिक्षा सकिएपछि व्यक्तिसँग कुनैपनि विषयमा हुनुपर्ने विशेष क्षमता र सीप विकास नहुँदा सरकारको लगानी र अभिभावकको चाहना सफल नभएकोमा दुःख व्यक्त गर्दै मन्त्री खड्काले आगामी दिनमा बागमती प्रदेश सरकारले नयाँ ढंगको शिक्षा प्रणाली लागू गर्ने प्रतिबद्धता व्यक्त गरे । मन्त्री खड्काले वर्तमान शैक्षिक प्रणाली सुधारको लागि उद्योग वा रोजगार प्रदायक क्षेत्रसंँग समन्वय गरी सोहीअनुसार जनशक्ति उत्पादन गर्ने पाठ्यक्रम विकास गर्नुपर्नेमा उनको जोड थियो ।
विद्यालय व्यवस्थापन समितिका अध्यक्ष बलराम घिमिरेको सभाध्यक्षतामा भएको कार्यक्रममा बागमती प्रदेशसभा सदस्य एकालाल श्रेष्ठ, हेटौंडा उपमहानगरका प्रवक्ता तथा १ नं. वडाअध्यक्ष सविन न्यौपाने, २ नंं वडाअध्यक्ष विष्णुगोपाल महर्जन, विव्यसका पूर्वअध्यक्षद्वय गुणराज घिमिरे, मधु बजगाई, सिद्धार्थ ल क्याम्पस प्रमुख मोहनप्रसाद शर्मा, विद्यालय ब्यवस्थापन समिति सदस्य लक्ष्मी श्रेष्ठलगायतले शुभकामना मन्तव्य व्यक्त गरेका थिए ।
