विशिष्ट युवा प्रतिभा पहिचान कार्यक्रमः नवाचार र उद्यमशीलताको नयाँ युग
हेटौंडा-युवामा रहेको सिर्जनात्मक क्षमता र उद्यमशील सोचलाई मूर्तरुप दिन प्रदेश युवा परिषद् बागमती र मकवानपुर बहुमुखी क्याम्पसको सहकार्यमा ‘विशिष्ट युवा प्रतिभा पहिचान कार्यक्रम’ सञ्चालनमा ल्याइएको छ ।नवाचारलाई प्रोत्साहन गर्दै युवा स्टार्टअपलाई आवश्यक परामर्श, वित्तीय सहायता, प्रविधि तथा पूर्वाधारको पहुँच उपलब्ध गराउने लक्ष्यसहित सुरु गरिएको यस कार्यक्रम निरन्तर सञ्चालन हुने आयोजकले बताएका छन् । कार्यक्रमलाई थप व्यवस्थित र प्रभावकारी बनाउन मकवानपुर बहुमुखी क्याम्पसका प्रमुख र प्रदेश युवा परिषद् बागमतीका उपाध्यक्षबीच समझदारीपत्र आदान–प्रदान गरिएको थियो ।
समझदारीपत्र आदानप्रदान कार्यक्रममा मकवानपुर बहुमुखी क्याम्पस संचालक समिति अध्यक्ष अनन्त पौडल, क्याम्पसका निवर्तमान अध्यक्ष एवम् बागमती प्रदेशका प्रथम मुख्यमन्त्री डोरमणि पौडेल, परिषद्का कार्यालय प्रमुख रमेश घिमिरे, स्ववियू सभापति प्रसिद्ध रेग्मीलगायतको उपस्थिति रहेको थियो । कार्यक्रम अन्तर्गत नवप्रवर्तनशील सोचलाई व्यवसायमा रुपान्तरण गर्दै उद्यमशीलता प्रवद्र्धन तथा रोजगारी सिर्जना गर्ने लक्ष्य राखिएको छ ।
विभिन्न चरणमा छनोट गरिने युवा नवप्रवर्तकलाई स्टार्टअप इन्क्यूबेटरमार्फत सहजीकरण गरिनुका साथै व्यवसायिक तालिम, नेतृत्व विकास, लगानी व्यवस्थापन र डिजिटल मार्केटिङसम्बन्धी ज्ञान प्रदान गरिनेछ । नवाचारयुक्त स्टार्टअपको पहिचान गरी तिनलाई राष्ट्रिय तथा अन्तर्राष्ट्रियस्तरमा प्रतिस्पर्धी बनाउनका लागि आवश्यक सहयोग तथा पूर्वाधार उपलब्ध गराइने आयोजक संस्थाले जनाएका छन् ।
लगानीकर्तासँग प्रत्यक्ष सम्पर्क स्थापना गर्दै युवा व्यवसायीलाई वित्तीय स्रोत जुटाउन सहायता पु¥याउने योजना बनाइएको छ भने स्टार्टअप एक्सपो, इनोभेशन समिट तथा उद्यमशीलता प्रवद्र्धन गर्ने विभिन्न कार्यक्रम सञ्चालन गरिने तयारी गरिएको छ । परिषद्का कार्यकारी उपाध्यक्ष सन्तोष चौलागाईंका अनुसार, देशको आर्थिक वृद्धिमा योगदान गर्ने उद्देश्यले सञ्चालन गरिएको यो कार्यक्रमले नवीन सोचलाई व्यावसायिक सफलता दिलाउने मात्र नभई स्थानीय उत्पादनलाई प्रवद्र्धन गर्दै स्वदेशमै रोजगारी सिर्जना गर्ने वातावरण निर्माण गर्न मद्दत गर्नेछ ।
प्रतिभावान् युवालाई स्वदेशमै अवसर प्रदान गर्दै ब्रेन ड्रेन न्यूनीकरणमा टेवा पु¥याउने विश्वास गरिएको छ । कार्यक्रमअन्तर्गत नवप्रवर्तक तथा स्टार्टअपलाई वित्तीय सहायता र लगानीको व्यवस्थापन गर्न विभिन्न उपाय अपनाइने छन् । प्रतिस्पर्धी रुपमा अनुदान वा बीउपुँजी उपलब्ध गराइने, स्टार्टअपलाई लगानीकर्तासँग जोड्ने अवसर प्रदान गरिने, बैंक तथा वित्तीय संस्थासँग सहकार्य गरी उद्यमशील युवा स्टार्टअपलाई सहुलियतपूर्ण ऋण उपलब्ध गराइने, स्टार्टअप व्यवसाय दर्ता, कर व्यवस्थापन तथा लगानी स्रोत पहिचानका लागि परामर्श दिइने, उद्यमशील युवालाई स्टार्टअप प्रवद्र्धनका लागि जोखिम पूँजीको पहुँच उपलब्ध गराइने तथा नवप्रवर्तनशील स्टार्टअपलाई अनुदान वा सहुलियतपूर्ण वित्तीय सहायता प्रदान गरिने योजना रहेको छ ।
कार्यक्रम अन्तर्गत नवप्रवर्तनशील विचारको संकलन तथा छनोटका लागि अनलाइन आवेदन फारम उपलब्ध गराइनेछ । प्रारम्भिक छनोट समिति गठन गरी नवाचार मूल्यांकन गरिनेछ भने अनुभवी उद्यमी, विज्ञ तथा अनुसन्धानकर्ताको संलग्नता सुनिश्चित गरिनेछ । ह्याकाथन, पिचिङ कम्पिटिसन वा आइडिया च्यालेन्ज जस्ता कार्यक्रम सञ्चालन गरी छनोट गरिएका स्टार्टअपलाई आवश्यक प्रविधि तथा स्रोतसाधन उपलब्धगराइनेछ र व्यावसायिक मोडेल विकासका लागि सहजीकरण गरिनेछ ।
आयोजकका अनुसार, नवाचार, प्रविधि र वित्तीय पहुँचको प्रवद्र्धन गर्दै दिगो विकास लक्ष्य हासिल गर्न केन्द्रित यो कार्यक्रमले युवा उद्यमशीलताको नयाँ युगको सुरुवात गर्ने अपेक्षा गरिएको छ । इच्छुक युवालाई यस अवसरलाई सदुपयोग गर्न आवेदन दिन आह्वान गर्दै आयोजकले नवप्रवर्तनशील सोचलाई मूर्तरुप दिन सक्रिय सहभागिताको लागि आग्रह गरेका छन् ।
